Балалары немесе ипотекасы бар отбасылар үшін өмірді сақтандыру полисінің болуы қаншалықты маңызды

Балалары немесе ипотекасы бар отбасылар үшін өмірді сақтандыру полисінің болуы қаржылық жоспарлаудың аса маңызды элементі болып табылады. Полис сатып алу асыраушысы қайтыс болған жағдайда отбасының міндеттемелерін толығымен өз мойнына алатын қаржылық сақтандырғыш рөлін атқарады: банкке ипотека бойынша өтелмеген қалдықты төлейді, балаларды асырауға, олардың білім алуына және күнделікті шығындарды жабуға қаражат қамтамасыз етеді. Оның үстіне, сақтандыру полисі қайғылы оқиғалар болмаса да жоғары табыс әкеледі. Мұнда өмірді сақтандыру компанияларының (ӨСК) көмегімен капиталды қалай еселендіруге болатынын айтып береміз. Балалары бар немесе ипотека сияқты ұзақ мерзімді қаржылық міндеттемелері бар отбасы үшін өмірді сақтандыру — жай ғана қосымша мүмкіндік емес, қаржылық қауіпсіздіктің маңызды құралдарының бірі. Ол негізгі табыс көзімен бірдеңе болып қалған жағдайда жақындарын елеулі қаржылық күйзелістерден қорғауға мүмкіндік береді.

«Ипотека өздігінен елеулі қарыз болып саналады, ал қарыз алушының еңбекке жарамсыздығы немесе қайтыс болуы жағдайында ол отбасы үшін көтере алмас ауыр жүкке айналуы мүмкін. Мынадай жағдайды елестетіңіз: негізгі асыраушы ауыр жарақат немесе ауыр науқасқа шалдығып, жұмыс істеу мүмкіндігінен айырылады, ал сонымен бірге несиені өтеу міндеті жалғаса береді. Сақтандыру қорғауынсыз бұл тұрғын үйді сатуға немесе туыстардың мойнына түсетін қарыздарға әкелуі мүмкін», — деп түсіндіреді Freedom Life ӨСК-нің басқарма төрағасы Азамат Ердесов.

Мұндай жағдайларда қарыз алушының өмірін сақтандыру полисі тек қаржылық жастық қана емес, психологиялық тыныштық та береді. Ол күтпеген жағдайлар туындаған кезде — сақтандырылған адамның жазатайым оқиға салдарынан қайтыс болуы немесе I не II топ мүгедектігінің белгіленуі болсын — несиені жақын адамдар емес, сақтандыру компаниясы өтейтініне кепілдік береді. Мұндай полистің құны әрдайым несие сомасына, шарттың қолданылу мерзіміне және таңдалған сақтандыру тәуекелдерінің жиынтығына қарай жеке-дара есептеледі.

«Сақтандыру полисі ертеңгі күнге деген сенімділікті қамтамасыз етеді: күтпеген жағдайлар мен еңбекке жарамсыздық не асыраушыдан айырылу жағдайында ипотека жабылады, балалардың оқуы ұйымдастырылады, табысты алмастыру арқылы отбасының өмір сүру деңгейін сақтап қалуға болады (мысалы, өмірді жинақтаушы сақтандыру (ӨЖС) шартының соңына дейін жинақталған сомаға кейін жалға беруге болатын жылжымайтын мүлік сатып алуға болады)», — деп нақтылайды «Мемлекеттік аннуитеттік компания» ӨСК өкілдері. Егер отбасында кәмелетке толмағандар тәрбиеленсе немесе отбасы ипотека алса, сақтандыру полисінің болуы — бірінші кезектегі іс. «Келешек» мемлекеттік бағдарламасының арқасында шағын жарналармен баланың болашақ жоғары білімін төлеуге жеткілікті соманы жинауға болады.

«Тек сақтандыру полисі ғана мұны ата-анасының тірі-өлі екеніне және олардың еңбекке жарамдылық жағдайына қарамастан кепілді түрде жасауға мүмкіндік береді. Қазіргі кезде мұндай жинақтар бюджет қаражаты есебінен субсидияланатын бірқатар мемлекеттік бағдарламалардың жұмыс істеп тұрғаны маңызды. Егер бұл мүмкіндікті пайдаланбаса, балалардың кәмелетке толу уақыты жеткенде отбасы ЖОО-ны төлеу үшін ақша қарызға алу туралы ойлануға мәжбүр болады. Бұл жағдайда отбасы несие берушіге пайыздарды артық төлеуге мәжбүр болады, ал сақтандыру полисі болса, керісінше, инвестициялық табыс мемлекеттің субсидияларымен бірге төленген жарналарға бөлінеді», — деп нақтылайды «Евразия» ӨСК-де.

Полистердегі айырмашылықтар

Өмірді жинақтаушы сақтандырудың (ӨЖС) кәдімгі өмірді сақтандырудан басты айырмашылығы — дәл болашаққа ақша жинақтау мүмкіндігінде. Түрлі бағдарламалар аясында сақтандыру компаниясы әртүрлі қаржы құралдарына инвестициялайтын тұрақты немесе бір реттік жарналар қарастырылған. Шарт мерзімі аяқталған соң клиент сақтандыру төлемін инвестициялардың табыстылығымен бірге алады. «Кәдімгі сақтандыру — белгілі бір тәуекелдерден қорғау. Егер сақтандыру жағдайы туындамаса — төлемдер жоқ. Жинақтаушы сақтандыру — қорғау мен жинақтың үйлесімі. Адам үнемі жарна төлеп, сақтандыру қорғауын алады, ал мерзім соңында бүкіл сомасын табыстылығымен бірге қайтарып алады. Бұл оқу, зейнетақы, тұрғын үй және т.б. сияқты маңызды мақсаттарға жинақтау үшін әсіресе қолайлы. Осылайша, пайда — қосарлы: қорғау + жинақ», — деп нақтылайды «Халық-Life» ӨСК-де.

Депозит vs полис

Қазақстанда дәстүрлі түрде банк депозиттері танымал, алайда өмірді жинақтаушы сақтандыру полистері неғұрлым тиімді балама болып келеді. Табыстылығы сыйақы мөлшерлемесімен шектелген депозиттен айырмашылығы (мысалы, доллар депозиттерінің мөлшерлемесі 1%-дан аспайды), жинақтаушы сақтандыру бірден екі қызметті біріктіреді: өмір мен денсаулықты қорғау, сондай-ақ жоғарылатылған табыстылықпен капитал қалыптастыру. Кейбір ӨСК-лер табыстылығы 2,5%-дық валюталық полистерді ұсынады.

«Жинақтаушы сақтандыру өнімдері депозиттегідей қаражатты жинауға және еселендіруге ғана емес, сонымен қатар сақтандыру жағдайы орын алса, шарттың қолданылу мерзімінің ең басында-ақ сақтандыру төлемін толық көлемде алуға мүмкіндік береді», — деп атап өтеді Nomad Life ӨСК-де. Сақтандыру компаниялары клиенттердің жарналарын әртүрлі қаржы құралдарына инвестициялайды, бұл ұзақ мерзімді перспективада депозиттер бойынша орташа көрсеткіштен жоғары табыстылықты қамтамасыз етуге мүмкіндік береді. Оған қоса, сақтандыру полисі салықтық жеңілдіктер береді және отбасының қаржылық қорғауын кепілдендіреді, бұл оны жинақтау мен қауіпсіздіктің неғұрлым әмбебап құралына айналдырады. «31 тамыздан бастап өмірді жинақтаушы сақтандырудың барлық шарттары Сақтандыру төлемдеріне кепілдік беру қорының кепілдендіру жүйесіне қосылады. Бұл сақтандыру компаниясы банкротқа ұшыраған немесе лицензиясы кері қайтарылған жағдайда, сақтандыру шарттары басқа сақтандырушыға берілгенге дейін клиенттер алдындағы міндеттемелерді СТКҚ орындайтынын білдіреді. Оның үстіне, бүгінде рәсімдеу барынша қарапайым болды: біздің компанияны қоса алғанда, көптеген компаниялар кеңсеге бармай-ақ ЭЦҚ арқылы шартқа онлайн қол қоюды ұсынады. Бүкіл процесс — тарифті есептеуден полисті алуға дейін — 15 минуттан аспайды. Егер медициналық анкета қажет болса, ол да онлайн толтырылады. Қажеттінің бәрі — интернетке қосылған телефон немесе компьютер», — деп атап өтеді BCC Life ӨСК-нің басқарма төрағасы, СТКҚ директорлар кеңесінің мүшесі Гүлжан Джаксымбетова.

Полис таңдаған кезде сақтандырушылар компанияның сенімділігіне, беделіне, шарттардың ашықтығына және төлемдердің жылдамдығына назар аударуға кеңес береді. Оның қатарында маңыздысы — ыңғайлы цифрлық сервистер: онлайн-рәсімдеу, жеке кабинет, қолжетімді қолдау. Дегенмен, қыңыр туыстарды қалай көндіруге болады? «Мен әрдайым: бұл шығын емес, тыныштық пен қауіпсіздікке салынған инвестиция, деп айтамын. Полистің құны мен ол болмаған кездегі ықтимал салдарды салыстырыңыз. Бұл шығын емес, отбасының қаржылық қауіпсіздігіне салынған инвестиция екенін түсіндіріңіз. Нақты мысалдар келтіруге болады — сақтандыру қарыздан құтқарған немесе сапалы емделуге мүмкіндік берген кездер. Ең бастысы — біз өмірді емес, қалғанының бәрін қамтамасыз ететін табысты сақтандыратынымызды еске салу керек», — деп қорытындылайды «Коммеск-Өмір» өмірді сақтандыру компаниясының басқарма төрағасы Олег Ханин.

https://prodengi.kz/kz/post/naskolko-vazno-imet-straxovku-zizni-dlya-semei-s-detmi-ili-ipotekoi