20 жыл бойы біз қазақстандықтардың тұрақты болашағы үшін ең жақсы сақтандыру шешімдерін енгізіп келеміз.

Қазақстан Республикасының Қаржы нарығын реттеу және дамыту агенттігі мүдделі мемлекеттік органдармен бірлесіп «Сақтандыру нарығы туралы» және «Қазақстан Республикасының сақтандыру нарығын реттеу және дамыту мәселелері бойынша кейбір заңнамалық актілеріне өзгерістер мен толықтырулар енгізу туралы» заң жобаларын әзірледі.

Заң жобалары Мемлекет басшысының 2026 жылғы 10 ақпанда Қазақстан Республикасы Үкіметінің кеңейтілген отырысында берген тапсырмасын орындау мақсатында әзірленді және сақтандыру нарығын одан әрі дамытуға, оның тұрақтылығын арттыруға, сақтандыру қызметтерін цифрландыруға және азаматтардың құқықтарын қорғауды күшейтуге бағытталған.

Ұсынылып отырған өзгерістердің негізгі бағыттарының бірі жер сілкіністерінен, су тасқындарынан (су басудан) және табиғи сипаттағы орман өрттерінен тұрғын үйді міндетті сақтандыруды енгізу болып табылады.

Қаралып отырған модель шеңберінде «Мемлекеттік аннуитеттік компания» өмірді сақтандыру компаниясы» АҚ базасында еншілес ұйым ретінде коммерциялық емес акционерлік қоғам нысанында Тұрғын үйді міндетті сақтандыру қорын құру көзделеді.

Қорға тұрғын үйді міндетті сақтандыруды ұйымдастыру, сақтандыру резервтерін қалыптастыру, азаматтарға сақтандыру төлемдерін жүзеге асыру, сондай-ақ жылжымайтын мүлікті ерікті сақтандыру бойынша жекелеген тәуекелдерді қайта сақтандыру функцияларын жүктеу жоспарлануда.

Міндетті сақтандыру шарты электрондық нысанда 12 ай мерзімге жасалады деп көзделуде. Шарттарды ресімдеу, сақтандыру сыйлықақыларын есепке алу және сақтанушылармен өзара іс-қимыл жасау үшін Қордың орталықтандырылған ақпараттық жүйесін құру жоспарлануда.

Сақтандыру сыйлықақысының мөлшері өңірлік тәуекел коэффициенттері және аумақтың жер сілкінісіне, су тасқынына және табиғи сипаттағы орман өрттеріне ұшырау дәрежесі ескеріле отырып қалыптастырылатын болады. Мұндай тәсіл сақтандыру қорғанысының құнын айқындау кезінде нақты өңірдің ерекшеліктерін ескеруге мүмкіндік береді.

Сақтандыру жағдайы басталған кезде азаматтар сақтандыру төлемін алу үшін, оның ішінде электрондық нысанда өтініш бере алады. Сақтандыру жағдайын растау тәртібі, төлемдердің мөлшері мен оларды жүзеге асыру мерзімдері Қазақстан Республикасының заңнамасында айқындалатын болады.

Сонымен қатар Қордың міндеттеріне сақтандыру резервтерін басқару, тәуекелдерді қайта сақтандыруға беру, активтерді инвестициялау, мемлекеттік және жергілікті атқарушы органдармен өзара іс-қимыл жасау, сондай-ақ халық арасында ақпараттық-түсіндіру жұмыстарын жүргізу енгізіледі деп жоспарлануда.

Негізгі заң жобасында Қордың қаржылық тұрақтылығына, корпоративтік басқару жүйесіне, тәуекелдерді басқаруға және ішкі бақылауға ерекше назар аударылған. Оның қызметі Қазақстан Республикасының Қаржы нарығын реттеу және дамыту агенттігінің мемлекеттік реттеуі мен қадағалауы шеңберінде жүзеге асырылатын болады.

Қорды құру азаматтарды ірі табиғи апаттардың салдарынан қаржылық қорғаудың орнықты тетігін қалыптастыруға, сақтандыру төлемдерінің уақтылы жүзеге асырылуын қамтамасыз етуге және сақтандыру жүйесінің апатты тәуекелдерге дайындығын арттыруға бағытталған.

Қазіргі уақытта заң жобалары қаралу сатысында. Қор қызметінің жекелеген параметрлері, оның ішінде жарғылық капиталды қалыптастыру, қаржыландыру көздері және ұйымдық модель мәселелері пысықталуда.